Адны без адных
СПАМПУЙЦЕ ПРЭЗЕНТАЦЫЮ POWER POINT
СПАМПУЙЦЕ ТЭОРЫЮ І ЗАДАННІ Ў WORD
“Узаемныя” займеннікі
Да якой часціны мовы адносіцца слова адзін? Так, гэта, безумоўна, колькасны лічэбнік. Аднак ёсць пэўныя канструкцыі, у якіх ён можа выконваць і іншую функцыю, напрыклад, займенніка. Таццяна Рамза нават вылучае асобную катэгорыю — узаемныя займеннікі.
Параўнайце:
Прыйшоў адзін чалавек (лічэбнік).
Мужчыны даўно не бачыліся адзін з адным (займеннік).
Апошняя канструкцыя на рускую перакладаецца словазлучэннем друг с другом. У адрозненне ад рускай, у нашай мове, у залежнасці ад таго, пра каго ідзе гаворка: асобаў жаночага ці мужчынскага полу — будуць ужывацца тыя ці іншыя формы абодвух словаў у канструкцыях. Прычым скланяцца ў такіх канструкцыях будзе толькі апошняе слова.
- Калі гэта 2 асобы жаночага полу: адна адной, адна адну, адна з адной.
- Калі гэта 2 асобы мужчынскага полу: адзін аднаго, адзін аднаму, адзін з адным.
- Калі гэта асобы рознага полу: адно аднаго, адно аднаму, адно з адным.
- Калі гэта больш за 2 асобы: адны адных, адны адным, адны з аднымі.
Трэба заўважыць таксама, што ў жывым маўленні часам сустракаюцца формы кшталту адзін другога, адна другую.
Заданні
УВАГА! Каб пабачыць правільныя адказы, вылучыце курсорам вобласць побач з зорачкай!
Устаўце патрэбную канструкцыю:
- Вольга і Уладзь закаханыя * адно ў аднаго.
- Прадстаўнікі дэлегацый абедзвюх краін павіталіся * адны з аднымі.
- Хоць Ганна і Марыся даўно ведаюць * адна адну, працягваюць трымацца надзвычай афіцыйна.
- Першыя месяцы пасля вяселля маладыя любілі бавіць вольны час * адно з адным.
- Так і дажывалі свой век бабуля з дзядулем * адно пры адным (адно з адным).
- Суседкі раптам убачылі * адна адну і сумеліся.
- Дзеці згуртаваліся ў чатыры каманды і спрабавалі перахапіць ініцыятыву * адны ў адных.
- Штовечар маці і сын тэлефанавалі * адно аднаму.
- Браты-блізняты не ўяўляюць сваё жыццё * адзін без аднаго.
- Сяброўкі пасля гэтага выпадку зусім перасталі давяраць * адна адной.
Перакладзіце сказ Мы не общаемся друг с другом вот уже много лет, дзе мы 1.) 2 сястры; 2.) 2 браты; 3.) сястра і брат; 4.) сёстры і браты.
- Мы не кантактуем * адна з адной вось ужо многа год (шмат гадоў).
- Мы не кантактуем * адзін з адным вось ужо многа год (шмат гадоў).
- Мы не кантактуем * адно з адным вось ужо многа год (шмат гадоў).
- Мы не кантактуем * адны з аднымі вось ужо многа год (шмат гадоў).