Сябры!

Вітаем вас у службе бясплатных перакладаў курсаў “Мова Нанова” – “Хуткай моўнай дапамозе”!

Мы сабралі каманду прафесійных філолагаў-валанцёраў, якія досыць аператыўна (сёння на заўтра) выканаюць для вас пераклады з рускай, а пры патрэбе – і з некаторых іншых моваў.

Крытэр у нас адзін – пераклад мусіць выкарыстоўвацца ў публічнай сферы: сайты, шыльды, афішы, складнікі на таварах, цэтлікі ў крамах, меню ў рэстарацыях, рэклама і г.д. Рашэнне – перакладаць ці не – мы прымаем супольна камандаю “Мова Нанова” і пасля даем абгрунтаваны адказ.

То бок, са школьнымі сачыненнямі і ўніверсітэцкімі курсавымі дапамагаць не будзем 

Абмежаванне па колькасці знакаў – 5000. Але ў асобных выпадках, калі пераклад напраўду грамадска значны, будзем рабіць выключэнні.

Ніякіх умоваў мы не ставім, але маем 2 просьбы да ўсіх, хто скарыстаецца нашым сервісам: 1. парэкламаваць яго ў сацсетках, ці дзе яшчэ 2. напісаць нам водгук, ці спадабалася вам.

Распаўсюджвайце гэтую інфармацыю між знаёмых, фірмаў і кампаній!

Зрабіць крок у бок беларускай мовы стала яшчэ прасцей!

Каб звярнуцца па дапамогу, проста запоўніце наступную форму. Па ўсіх пытаннях звяртайцеся на мэйл movananova@gmail.com

НАШЫЯ ПРАЦЫ:

НАШЫЯ ЭКСПЕРТЫ-ПЕРАКЛАДНІКІ

	Вольга Барысенка – кандыдат філалагічных навук, дацэнт кафедры беларускай мовы і літаратуры Мінскага дзяржаўнага лінгвістычнага ўніверсітэта. Тэма дысертацыі “Творчасць В.Ластоўскага ў ідэйна-мастацкім кантэксце беларускай літаратуры пачатку ХХ ст.”. Кіраўніцтва навукова-даследчымі праектамі, у тым ліку “Беларуска мова як замежная: тэарэтычныя, навукова-метадычныя і  практычныя аспекты праблемы”. Навуковыя інтарэсы: беларуская мова як замежная, этычныя і рэлігійныя праблемы беларускай літаратуры ХХ – ХХІ ст.
	Аксана Семянькевіч – старшы выкладчык кафедры беларускай мовы і літаратуры Мінскага дзяржаўнага лінгвістычнага ўніверсітэта. Скончыла філалагічны факультэт Беларускага дзяржаўнага ўніверсітэта, аўтар 38 публікацый. Удзельнічала ў стварэнні Беларуска-англійскага слоўніка і навуковай праграме  па праблемах выкладання беларускай мовы як замежнай.
	Наталля Шапран – закончыла філалагічны факультэт БДУ і аспірантуру Інстытута мастацтвазнаўства, этнаграфіі і фальклору Нацыянальнай акадэміі навук Беларусі. Працавала намеснікам дырэктара Мінскага дзяржаўнага мастацкага вучылішча імя А. К. Глебава. З 2008 года працуе ў часопісе “Роднае слова”, рэдактар аддзела культуры.
	Даша Слабчанка – перакладніца-энтузіястка