Пра курсы
ГАРАДЫ :

| Тэма: Якасці людзей

10.01.2014
ГІСТОРЫЯ МОВЫ Беларускія тастаменты XVI ст.

Што пісалі беларусы ў тастаментах  у 1565 годзе?..

За пададзеныя матэрыялы дзякуем гісторыку Вользе Бабковай.

Перапрашаем: некаторыя літары не адлюстроўваецца, бо сайт не падтрымлівае адпаведны шрыфт. Але прачытаць можна. І — вельмі цікава!                                                                                                                                                                                                                            

1590 г. лютага 14. Івачэвічы. — Тастамент зямяніна Берасцейскага ваяв. Яна Міхайлавіча Лазавіцкага. (Актыкацыя 27 чэрвеня 1590 г.)

НГАБ. Ф.1741. Воп.1. Спр. 4. Арк. 395—397

 [395] Лета Бож(ого) нарож(еньӕ) 1590, м(е)с(е)ца июнӕ 27 днӕ. |

 []«Бүдүчы ӕ, Ӕн Михаилович Лозовицкии, земенин г(о)с(пода)рскии воеводства | Берестеиского, з допүщенӕ Божого хоробою зложоным навежоныи, а вшак же помнечы на час смерти, | котораѧ над вси речы на свете кождому чоловекү, родившомусе на свет, ест напевнеиша и непохи|бна. При добром розүме и зүполнои памети, абы по жывоте моем, кгды бы на мене в тои хоробе Пан | Богъ смерть допустити рачыл, жону мою и дети мои з нею спложоные, сынов двох, так теж имене | и дв[ор]1 зо всею маетностю моею по жывоте моем в добром порӕдку и ѡпартности зостати могли. Ѡста|тнюю волю мою сес тестамент списавши, в нем все по достатку зоставүю и ѡтписүю.

Наперед дүшү | мою Пану Богу Вседержытелю и Сотворытелю неба и земли в рүки Его Св(е)тые порүчаю, ѡтдаю и | ѡферүю, маючы в нем надею зуполную, же мене не длӕ заслугъ моих, але длӕ Исүса Хрыста, С(ы)на | своего, збавителӕ моего, в ден змартвыхвстанӕ взбүдивши, в чом не вонтплю, до живота вечного в Кро||[396]левстве Своем Небеском доместити бүдет рачыл. Тело мое грешное, абы ӕко землӕ, земли ѡтда|но, и было поховано водлугъ ѡбычаю хрестӕнского на полю моем властном под грушою, подле до|роги, котораѧ идет с Кобрынӕ до Городца, а негде индеи.

Жонү мою милую пани Раинү | Калиховичовнү и дети мое, сыны два, Крыштофа а Адама Лозовицких з нею, малжонкою моею | пани Раиною спложоные, в летех малых недорослых, так теж тое имене и двор, прозываемое При|лүки, ѡтчызное, и всю маетност мою, лежачүю ү воеводстве Берестеиском, в опеку и в оборонү их м(и)л(о)сти | зацневрожоных п(а)ном его м(и)л(о)сти пану Федорү Потею, суди, а его м(и)л(ости) пану Лву Патею, писару, врӕдникомъ | земским воеводства Берестеиского, а панү Адамү Горновъскомү, земенину г(оспода)рскомү воеводства Бере|стеиского, и всю маетност мою лежачүю в опекү поручаю и даю. Которые ихъ милост п(а)н(о)ве ѡпе|күнове звышъписаные, от мене установленые, маючы в опеце своеи тую малжонку мою | звышъпомененүю, и дети мои звышъмененые, и тое имене мое, и двор Прилүки ѡт крывдъ | всӕких, ӕкъ ѡбаполных суседовъ, такъ и иншых боронити, аж до летъ тых детеи моих Крыштофа | а Адама.

На которои то части всего именӕ моего Прылукъ з м(и)л(о)сти моее малженское тои | малжонце моеи милои п(а)ни Раине Калиховичовне, по которои то малъжонце моеи дознавшы ӕ кү собе | малжонскую зычливост, м(и)л(о)ст и статечное заховане и үслуговане, за нелитованьем прац ее во всем по үвесь | тот час, ӕком ее, малжонку мою, за себе в стан св(е)тыи малженскии взӕл. И хотечы еи то нагородити, симъ | тестаментом ѡстатнею волею своею даю, дарую и записую до живота ее самое на том именю мешка|ти Прилүках и его вживати, и тые дети, сыны мое, еи в опекү порүчаю, але под таким способом, естли бы | замуж не шла. А естли бы замүжъ пошла, тогды тое имене Прилүки, всю част мою, и тые дети мои | Крыштофа а Адама Лозовицких, их м(и)л(о)ст п(а)н(о)ве ѡпекунове мают до рукъ своих взӕти с тым всим, што | на них прыналежати бүдет. И с того именӕ моего тым детем моим мают ихъ м(и)л(о)ст п(а)н(о)ве оѡпекунове выхова|нье и цвичене дават водле можности того именӕ моего Прилукъ. А тое имене мают сами держат аж | до летъ детеи моих. А што теж част брата моего небожчыка п(а)на Григорӕ Лазовицкого в том же именю | Прилукахъ, которое в заставе было ү певнои сүме п(е)н(е)зеи ү п(а)на Епимаха Бүховецкого в сту соро|ку и двүх копах грошеи лит(о)вские личбы, тую част малжонка моӕ п(а)ни Раина за свое властные гро|шы сама выкупила. Так теж и тот долгъ, которыи мне тот же брат мои, небожчикъ пан Григореи, | на лист свои винен зостал шестдесӕт копъ грошеи лит(о)вское личбы, тую сүмү всю еи, малжонце моеи, записую на | тои же части именӕ брата моего Прилукъ. А што се теж дотычет речеи моих рухомых, тогды все ре|чы рүхомые ѡт мала аж до велика, ӕкое ѡдно што назвати и поменити может речю рүхомою, | еи, малжонце моеи, вечне даю, дарую и записую. Так теж и иншие долги свое записую вечне, а то ест, ме|новите, першыи должникъ пан Адам Горновскии, которыи ми винен сто и деветнадцат копъ [г]рошеи2 ли|товских. А ү брати моее рожоное, ү п(а)на Петра Лозовицкого, копъ ѡденадцат литовъское личъбы, | ү п(а)на Андреӕ Лозовицкого копъ ѡсмъ литовъское личбы. Тые вси долги ѡт мала аж и до ве|лика еи, малжонце моеи, сим тестаментом ѡстатнею волею ѡтписүю своею, с которых тых дол|говъ мает малжонка моӕ долгъ мои пану Епимахү Бүховецкомү, ѡтыискавши тые долги, за|платити, то ест, копъ трыдцат чотыри кгрошеи тридцат лит(о)вское личбы.

А иншаӕ всӕ маетност | моӕ, лежачаѧ ү Жомоити, именьӕ Лукъшты и Вижүны, части мое, которые на [м]ене3 правом | прирожоным прыналежат, которые тые части тепер в заставе в сүме п(е)н(е)зеи сут заведены в соро|ку копах грошеи литовских ү п(а)на Воитеха Ивицкого, то детем моим ѡтписую. И мают ѡни тую су|мү п(е)н(е)зеи, сынове мои, панү Ивицкомү ѡтложити, а тые именӕ до себе взӕти, ӕко их властное. || [397] А штом тежъ мел справү свою с п(а)ном Адамом Горновъским ү Трыбуналу, тогды тую справу жона моӕ | мает ее до себе ѡдыискат ү прокуратора его м(и)л(ости) п(а)на воеводы витебъского ү п(а)на Маковецкого и при собе | ее заховат, а ѡстатокъ на П(а)на Б(о)га и на ѡпекуновъ их м(и)л(ость) пүщаю.

А при том справованю сего теста|менту ѡстаточное воли моее при мне были и того добре сведоми их м(и)л(о)ст п(а)н(о)ве: его м(и)л(о)ст панъ Юри Кендеравъскии; | а их м(и)л(о)ст п(а)н(о)ве пан Миколаи а пан Адам Павловичы Подаревские, хоружичы воеводства Новгородского; а | пан Воина Лазовицкии, возныи воеводства Берестеиского. И просил есми их м(и)л(ость) ѡ приложене печатеи и ѡ подписане | рүкъ, што их м(и)л(о)ст за үстною и ѡчевистою прозбою моею печати свои и рүки подписат рачили и печати при|ложили к сему тестаменту ѡстатнее воли моее.

Писан ү Ивачевичах, во именью его м(и)л(о)сти п(а)на Юрӕ | Кендеравского, лета ѡт нароженьӕ Сына Божого тисеча пӕтсот деветдесӕтого, м(е)с(е)ца февралѧ | чотырнадцатого днӕ».

 

1560 г. верасня 29. Беражкі. — Тастамент князёўны Мар’і Іванаўны Палубенскай. (Актыкацыя 30 верасня 1560 г.) 

НГАБ. Ф. 1737. Воп. 1. Спр. 1. Арк. 136—139 адв.

[Року 1560]* [136] м(е)с(е)ца сент(ебра) 30 днӕ. |

 [] «Во име Боже, стансе.

Ӕ, Марӕ Ивановна Полубенскаӕ, | ѡбачивши то, иж кождыи ч(о)л(о)в(е)къ жадное речи приш|лое певнеишое перед собою не мает, а певнеишое | ѡдно час и година смерти, и ачколвекъ ӕ, з Божего допу|щеньӕ на тот час будүчи на теле своемъ фораӕ, | але на розуме и на всих үмыслех своих добре здороваӕ | и никимъ не припужонаӕ, ани жадными намовами | зведенаӕ, леч сама по своеи доброи воли, з доброю па|метю, а з достаточнымъ а сталымъ розмышленнем | чиню сесь мои тастамент, то есть, ѡстаточную свою || [136 адв.] волю в тот ѡбычаи.

Напервеи дүшу свою, кгды сѧ1 з моимъ грешным | теломъ розделить, полецамъ и давамъ Господү Богу, Сотво|рителю и Ѡткупителю своему, ѡт которогомъ ее взела. | А грешному телу моему похованье ѡбрала есми в церкви | Үспеньӕ Пречистое Б(огоро)д(и)цы, котораӕ церков есть в замку | г(о)с(по)д(а)рьскомъ в Новегородцы. Маеть зѧть мои пан Иван Иванович | Лѧдскии, лесничии подлѧскии, з малжонкою своею, а сестрою | моею, в тои церкви, котораӕ в замъку г(о)с(по)д(а)рьскомъ Новгород|скомъ Үвуспеньӕ Пречистое Б(огоро)д(и)цы, ү великои церкви, а не в | приделе, против соверских двереи, подле столпа, тело мое | поховати. А на похованье тела и на розделене по дүши | моеи, на церкви Божеи дала есми пану Ивану Лѧдскому лан|цух мои золотыи, в которомъ важит сто тридцат золотых | чирвоных, которимъ ланцухомъ еще за живота2 своего небож|чица кн(е)г(и)нѧ матка моӕ мене доровала. Ино мает тот ланцух пан Лѧдскии на золотые, або на п(е)н(е)зи заменити | и на тую церковъ, на Үспенье Пречистое Б(огоро)д(и)цы, | гдѣ тело мое поховаеть, по дүши моеи мает дати | шестьдесѧт золотых чирвоных. А семидесӕтью | золотых чирвоных маеть пан Лѧдскии, грешное тело | мое поховавши, и ѡбыходы, то есть, памети | чинити и по дүши моеи на иншие церкви Божие | давати, што сѧ ему гдѣ видети будет.

А што сѧ | теж дотычеть части, на мене пришлое, ү выименью | н(а)шомъ сполномъ материстомъ Деречинъскомъ, || [137] котораӕ часть ѡт брати моее мнѣ выделена быти | мела. Нижли еще по cесь час ѡное именье н(а)ше Деречинское | не все было сполна вымерено и доморкговано, а затым | вечистого делу в томъ именью н(а)шомъ материстом, | ӕко старшие сестры мои, такъ теж и ӕ ѡт брати еще | не мели, ѡдно, иж скоро по смерти небожчицы кн(е)г(и)ни мат|ки н(а)шое, братӕ мои, не хотечи мене промежи себе | ховати, на тот же час до ровного делу вечистого | на часть мою поступили мнѣ на выхованье дворец | Деречинскии Бережки, которого дворца в части своеи и до | сего часу во в покоиномъ держанью маю и тепер держу. Которого дворца земли тепер мерне вымерили | волокъ пѧтдесѧт двѣ, а предсѧ кгды их м(и)л(о)сть | кн(ӕ)зи братю и сестры мои в томъ именю Деречин|скомъ вечистыи дел промежи себе мети захо|тѧт, што на мою часть ѡт их м(и)л(о)сти выделено | будет, тую част на мене пришлүю тог(о) именӕ нашог(о) материстог(о), | которуюм аж и до сег(о) часу во в покоиномъ держаню мела и мамъ, | записую и навечность дарую сестре моеи старшои п(а)неи Лӕдскои, | п(а)неи Богдане, а брату моему молотшому кнӕзю Ивану  Полу|бенскому, которую частку тог(о) именѧ материстог(о), на мене при|шлую, мают ѡни собе, по половицы поделевши, вечне держати | и вживати, и кому хотӕ ѡтдати, продати, даровати, и по животе | своем кому хотӕ записати. А иншие братӕ ани сестра || [137 адв.] моӕ п(а)ни Бенедиктоваӕ никоторими причинами не маетсӕ | в то үступовати вечними часы, бом то им записала за ѡсобливую | ласъку и добродеиство ѡсобливое, цнотливое ихъ ку мне, ӕко ку | сестре своеи заховане. Ку тому, што также по смерти небожщи|цы кн(е)г(и)ни матки н(а)шое и водлуг ѡпису на тастаменте небожчика | кн(ӕ)зѧ ѡтца н(а)шог(о), их м(и)л(ость) кн(ӕ)зи вси, братӕ мои, выделили мнѣ вено | на долгох записаных гр(о)шеи готовых, то ест: на п(а)ну виленском тепе|решнем, на п(а)ну Ерониму Александровичу сто семдесӕт коп гр(о)шеи ли(то)вских, | на кн(ӕ)зю Коширском, на теперешнем старосте луцкомъ сто сорок | коп гр(о)шеи литовских, на старшом брате моем, на кн(ӕ)зю Александру | сто коп грошеи ли(то)вских, а заставою на Стацка Лыщинского | людех трицет коп гр(о)шеи литовских, а на п(а)ну Ивану Горностаевичу, | што братӕ моӕ ү вене мне поступили, старог(о) долгу пѧтдесѧт | коп гр(о)шеи ли(то)вских. А ѡкром тог(о), ѡсобливе пан Иван Горностаевич | ү мене моих властных п(е)н(е)зеи позычил педесӕт коп гр(о)шеи ли(то)вских, | и с одног(о) ми лист дал на сто коп гр(о)шеи тог(о) всег(о), штобы мели п(ене)зи | братӕ готовымы гр(о)шми мне дат, и ѡны на записех тых, | вышеиѡписаных панов, мне дали сумою чинит коп | пѧтсот без десети гр(о)шеи. А ү выправе, то ест, в злоте, в перлах, | в клеинотах, в сребре, в шатах и ү инших рухомых речах, шацун|ком дали мне чотырыста пӕтдесӕт коп гр(о)шеи, ино водлуг | выправ старших сестръ моих и теж тестаменту небожчика | кн(ӕ)зѧ ѡтца н(а)шог(о), ӕко иншим старшим сестрам моим было дано | всее выправы кождои по тисечи3 коп грошеи литовских, | а мне еще ѡт братьи моее до тисечи коп гр(о)шеи не доставало | 60 коп гр(о)шеи ли(то)вских, и тую 60 коп гр(о)шеи вси братӕ мои || [138] на том же веновном листе ѡтписали ми се ѡтдат. А так ӕ, маючи | ѡт их м(и)л(ости) кн(ӕ)зеи братьи своее вено, волнаӕ кому хотѧчи вено свое | записати и даровати. Где ж напервеи старшии братьи своеи, кн(ӕ)зю Михаилу | а кнӕзю Андрею, ѡтписую на п(а)ну виленском теперешнем, на п(а)ну | Ерониму Александровичу, сто семдесӕт коп гр(о)шеи литовских. А што | теж кнӕз Александръ, брат мои, на листе своем зостал мне винен | сто коп гр(о)шеи ли(то)вских, тую сто коп гр(о)шеи ѡтписую доце его ж | старшои кнӕжне Марии. Шшо теж кнӕз Коширски винен | сто сорок коп гр(о)шеи, то ѡтписую детем брата моег(о) кн(ӕ)зѧ Федо|ра, кн(ӕ)зю Петру, а кнӕзу Матфею, а кнѧжне Ганне. А кн(ӕ)зю | Ивану, брату моему, ѡтписую на п(а)ну Ивану Горнастаевичу | сто коп грошеи, а трицат коп гр(о)шеи на Лыщинског(о) людех зоста|вою ѡтписую зӕтю моему п(а)ну Лѧдскому. И тые вси листы | на долги запысные, зоставилам ү молотшог(о) брата моего | кн(ӕ)зӕ Ивана Полубенског(о). А што сӕ дотыче речеи рухомых, | то ест, напервеи, которыи широкии ланцух золотыи ү вѣне ѡт | брати моее ү шацунку мне даныи, тот ланцух ѡтписую сестрен|цу моему п(а)ну Федору Ивановичу Лӕдскому. А што теж | перла в шацунку ү сту копах гр(о)шеи ү вѣне братӕ мне | дали, и теж пӕт поесов серебреных, два ѡбручи сребреных | позлотистых, а два на ѡксамите сребреных позло|тистых, а пӕтыи поес сребреныи, белыи без позлоты, | тые вси перла и пӕт поесов ѡтписую сестреницам моим панне | Катрине а панне Полонее Ивановнам Лѧдског(о). А которыи | клеинот и с шафером ѡт брати мне в шацункү даны в семи | копах гр(о)шеи, тот клеинот ѡтписую сестричке ж моеи панне Полаги | Ивановне. А которые шаты маю ѡт брати своеи, то ест, || [138 адв.] саӕнов, шата алтамбасоваӕ, а другаӕ шата ѡдамашки | черлонае, ү девети местцах злотоглавом брижованаӕ, третеӕ шата | ѡксамиту черлоног(о), четвертаӕ шата ѡдамашки гвоздиковое, | а пӕтаӕ шата ѡксамитү бурнатног(о), үробила колдру на постел, то | все, ӕк шаты, так и колдру, ѡтписую и дарую тым же сестрыч|кам моимъ, а дочкам п(а)на Лӕдског(о), панне Катерине а панне Поланеи. | А которое сребро маю ѡт братьи своее в шацунку, ү шестидесӕт | коп гр(о)шеи, то ест, полтора тузина ложок, кубков шест, а два ковши | и ку тому шату ѡдамашковүю, дикүю, куницами подбитую, | и статок цынованыи и мединыи, то все ѡтписую и дарую брату | моему молодшому кн(ӕ)зю Ивану. И ку тому ковры, запоны, скатерти, | ручники шитые и простые, то все ѡтписую и дарую тому ж молод|шому брату своему кн(ӕ)зю Ивану Полубенскому. А котораӕ | челед неволнаӕ по небожчицы кнегини матки н(а)шое м(е)не сѧ | зостала, таӕ, которую м(е)не еще за живота своего небож|чика кнѧзӕ ѡтца н(а)шог(о) даровалъ, потому ж, ӕко | и иншим сестрам старшим моим челѧд неволную подавали, | то ест, дали ми Соломонидичина4 Стефанца, тог(о) ѡтписую | и им дарую сына п(а)на Лѧдског(о), а сестренца моег(о) п(а)на Федора. | А Соломонидицү с трема ее сестрами Полонеицою, Ѡриницою | а Ѡвдотицою, а рикунӕнками двема Катериницою | а Ѡвдотицою, тымы шестми девками, дарую и ѡтписую | сесдре моеи панеи Лӕдскои, п(а)неи Богдане. К тому Катери|ницу и сыном ее Федорцом, а сестрою ее Ѡвдотицою, | а Булгаковны две Моницою а Жданицою, а Стефаницою | Тереховну, тую всю шестеро челеди ѡтписую и дарую || [139] брату моему молодшому к(нӕ)зю Ивану Полубенскому. А то тых | на волю выпущаю и вызволӕю. Нехаи за душу мою Б(о)га просѧт, | то ест, Ганну, Ѡвдотӕнку, Парасицу Булгаковну, Федорца Терехо|вича, Кузму, Степановог(о) сына. Таӕ четверо челӕди по животе | моем волны будут кому хотѧ служит. А которые маю возники | чотыри серые старие, а другие чотыры возники строкатые, | ино тымы чортырма серымы дарую и их ѡтписую сестринке | моеи, а дочце пана Лѧдског(о) панне Катерине. А тые строка|тые чотыры возники ѡтписую и дарую другои дочце | п(а)на Лѧдског(о) а сестричне моеи панне Полагеи.

За што | ӕ их м(и)л(ость) кн(ӕ)зеи брати моее и сестри моее п(а)ни Бенедиктовое | покорне прошу и напоминам, водлуг тое ѡстаточное | воли и сег(о) тестаменту моег(о), жебы вси речи, ӕко | на том тастаменте ѡписала, выполнены и моцне | держачы были, ни в чом тог(о) тестаменту моего | не ѡтступуючи, и ег(о) ничим не нарушиваючи. Ӕко ж есми | длѧ лепшое твердости к тому тестаменту моему | и печать свою приложила.

А при справе тог(о) теста|менту моег(о) были и тог(о) добре сведомы: ег(о) м(и)л(ость) пан | Ӕн Викторин, староста скиделскии и мостовски; | а служебник их м(и)л(ости) ӕсневелможных п(а)нов ег(о) м(и)л(ости) п(а)на | воеводы троцког(о), а п(а)на Ѡстафъӕ Воловича, | маршалка и писара г(оспо)д(а)рьског(о), пан Матеи Стефанович | Юржича; а пан Андреи Григоревич Пугачевич, которие | ѡт их м(и)л(ости) тут, в ыменю н(а)шом Деречинском, часъ немалыи спра|вуют платы, доходы и всѧкие пожитки тог(о) именӕ н(а)шог(о) | Деречинског(о) списуют; а пан Ӕн Горновскии, подстаростии || [139 адв.] волковыскии; а виж, ку тои праве з урѧду замку гр(о)дског(о) Слонимског(о) | мне приданыи, пан Юхно Ӕнович. Ӕко ж есми тых вышеимененых | п(а)нов просила ѡ приложене печатеи. И их м(и)л(ость) то на прозбу мою | вчинили и печати свои приложили к тому моему тестаменту. |

Писан ү Бережках, лет(а) Бож(его) нарож(еньӕ) 1560 року, м(е)с(ӕ)ца сент(ебра) 29 | днѧ, в неделю».

 

1595 г. студзеня 8. Віцебск. Тастамент зямяніна Віцебскага ваяв. Івана Нарковіча Падзвінскага. (Актыкацыя 18 студзеня 1595 г.)

 НГАБ. Ф. 1751. Воп. 1. Спр. 2. Арк. 81—82 адв.

 Лета ѡт нароженѧ Сына Божего тисеча пѧтсот |

деветдесѧт пѧтого, м(е)с(ӕ)ца генварѧ 18 днѧ. |

/…/ «Во име Ѡтца и Сына и Дүха Светого, | стансѧ волѧ Божѧ.

Ӕ, рабъ Божии Иван Наркович Подвинскии, ѡзнаимую во|лю свою ѡстаточною. Иж ӕ, будучи Иванъ верхуречоныи, ѡт Б(о)га Всемо|гущог(о) на сес час хоробою и велми тѧжъкою навежоныи, и будүчи еще при | доброи памети и в добромъ а зүполъномъ розүме моем, хотечи то меть | за Божею помочю и Сына ег(о), П(а)на н(а)шого м(и)л(о)стивог(о) П(а)на Езүса Христуса, | за доброе моее памети мое, все ведле баченѧ и розүму моег(о) еще зуполного роз|править, жебы по животе моем не было ниӕкого ростырку жонухне | моеи Ганне Колычовне с приӕтелми моими. То за зуполного розуму а доб|рое памети моее перед вознымъ и людми добрыми шлѧхътою так | розправую ѡстатнею волею моею печатую. То ест, напервеи поручаю Г(о)с(по)ду | Богу моему многом(и)л(о)стивому дүшү мою многогрешъную, а тело мое | земли. А то естъ по животе моемъ жону мою Ганну Колычовну поручаю | Г(о)с(по)ду | Б(о)гу Всемогущому и в моцъ и в оборону его м(и)л(о)сти п(а)ну Кузминьскому, писару | кгродскому, вопеку его м(и)л(о)сти п(а)ну Адаму Красовскому, земенину г(о)с(по)д(а)рьскомү | повету Витебского, а зӕтю моему Павлу Исаковичу.

Двор мои ѡтчизныи За|юровскии, ү повете Витебскомъ лежачии, со всимъ будованемъ, збожъемъ, | и со всею маетностю моею ѡт мала до велика, з кгрунты, сеножатми и совсим | на все, ӕко се тот двор мои Заюровскии з давъныхъ часовъ зо всѧкими зем|лӕми, з кгрунты мел и тепер мает, ү повете Витебъскомъ лежачии, | никому ничим не чинныи, жоне моеи Ганне Колычовне. Мает ѡна ү том дворе | моемъ жити и тымъ всим, што по животе зостало, всѧкими речми | владнути и поживати, тымъ всимъ шафовати: збожѧ, быдла, кони | и всимъ тымъ, што ѡдно рүхомыхъ речеи моими названо бүдет. Вес спрат мои | домовыи жоне моеи Ганне. А люди именьѧ моего Заюровского з кгрунты своими | на все, ӕкомъ записал и на врѧде сознал, кромъ дворное пашъни и двора, то | все сыну моему Ивану Нарковичу Подвинъскому, ӕко естъ шыреи а доста|точнеи на выписе врӕдовомъ сознаньѧ моего ест ѡписано и доложоно. | И то варүю и ѡзнаимую сею моею дүховницою. А имене мое прозываемое Заю|рова, в повете Витебскомъ лежачое, границами ѡписую и ѡзнаимую, || [82] почавшы ѡт Авдеевичов по Юров ручеи, а Юровымъ ручъемъ по Мажчалинү, по Маж|чалине — ү Глиновецъ, а зъ Глиновъца по мохъ, по пашънои земли, а ѡт тог(о) мъхү | по дубъ, а ѡт дүба Мажчалиною черезъ дорогү великую, котораѧ идеть | з Витебска до Суража ү рүчеи. А тымъ ручъемъ ѡпѧть ү Юров рүчеи. То и пишу | и ведомо чиню за доброе памети моее, идүчи на тот свет, длѧ того, жебы сын | мои Иван Нарковичъ Подвинскии, або дети и близские мои по моемъ животе тот | кгрунт, имене мое, ү тыхъ границах держали и вживали, а з людьми посторон|ними граничками моими заишъстьѧ завжды не мели. То теж деткамъ | моимъ на тои же дүховъницы моеи ѡзнаимую, ижъ панъ Светицкии Станислав, | перешедши границү именѧ моего звышъмененого, попахал властного кгрунту | моег(о) власного в границах верху ѡписаныхъ, тот мои кгрунт власныи. Того сын мои | або близкие мои не мают поступоват и моцно того боронит, бо то мои1 кгрунт влас|ныи именѧ моег(о) з Юровского. То теж ѡзнаимую, теж жона моѧ Ганна маеть | ү томъ дворе моемъ жит и на тых всих кгрунтахъ, к тому двору моему Заюровскомү| прислухаючом, не мает ее нихъто с того двора моего рушити и никоторое | кривды чинити до живота ее. А если бы сын мои Иван Наркович Подвинскии не | хотелъ мети матки своее, жоны моее, ү томъ дворе моемъ верхуречономъ | Заюровскомъ, ү повете Витебскомъ лежачомъ, тогды мает еи дати и запла|тити тридцат коп грошеи литовскихъ, а ѡна вольна будеть тую трид|цать копъ грошеи такъ при своемъ животе, ӕко по животе, кому хотѧ ѡ|тъдати и ку своему налепшому пожитку ѡбернути.

Ѡзнаимую тежъ | сею моею ѡстаточною волею, што кому виненъ: то ест, напервеи винен есми | Гавриле Клызе коп десеть грошеи, Станиславу Светицкому винен есми былъ | семъ копъ грошеи, том ѡтдалъ, а ѡн мне мемъраму ѡтдати не хотел, зӕтю | моему п(а)ну Павлу Исаковичу винен есми готовыхъ позычоных копъ ѡди|надцат [ӕ]ко2 ж и лист мои на то в нег(о) ест п(а)ну Лаврину Комарү, зӕтю своемү | другому, винен есми коп сем грошеи литовскихъ готовыхъ позычоных. Та | сын мои мает заплатит, абы на душы моеи не ѡставовал не ӕких. А што | ме позвал братанок мои Григореи Богданович Подвинскии до сүдү земского ви|тебского позвом земскимъ ѡ половицу именѧ моего Заюровского, в повете | Витебскомъ лежачого, ижъ ӕкобы мел небожчикъ Богданъ Подвинскии, брат мои, | а ѡтец [ег]о3, мне зоставит ү двух копахъ грошаи, теды то ѡзнаимую, же ѡтец их, | а брат мои небожчикъ Богданъ Подвинъскии з близкихъ моих з давъ|ных часов до тог(о) именѧ Заюрова ничого не мели и тепер не мает […]4 || [82 адв.] пан братанокъ мои позвал, не маючи до тог(о) ничого. Того сын мои Иван Наркович Подвин|скии боронити маеть, або дети мои, бо братанокъ мои так Григореи, ӕко | и Тимофеи ничого не мают и мети не будут. До того еще ѡзнаимую деткам своим на тои | же дүховницы своеи, иж небожчица матка моѧ п(а)ни Борисоваѧ Подвинскаѧ Ганна | Андреевна Коптевича ѡписала на дүховъницы своеи брату моему небожчи|кү Богдану Подвинскому десеть копъ грошеи, а по смерти его ино мне з ла|ски своее матчиньское, которую небожчикъ ѡтецъ мои а муж ее Борис Под|винскии ѡписал на именью своемъ Ѡвъдеевичахъ вена матце моеи Борисовои | Подвиньскои, тотъ долгъ, то естъ десеть копъ грошеи литовъских, мають | ѡдыскат сынъ мои Иван Нарковичъ Подъвинскии, або зѧти мои пан Лавринъ | Комар або пан Павел Исаковичъ. То им ѡписую и ѡзнаимую и вжо бымъ ӕ тую | десеть коп грошеи на тых братанкахъ своих давъно ѡдыскал, ено ме зав|жды прозбами своими ѡбезпечали, абымъ имъ был терпливымъ, | теды ӕ терпелъ и до сег(о) часу, а тепер поручаю то деткам своим и ѡтписываю. |

И на то ӕ, Иван Наркович Подвинскии, ѡзнаимивши на сеи моеи дүховцы ѡста|точною волею моею, ѡставивши жоне моеи и сыну моему Ивану Нарковичу | Подвиньскому, ӕко вышеи на сеи дүховницы моеи естъ вышеи ѡписано и | доложоно, дал.

А при томъ были и того добре сведоми земѧне г(о)с(по)д(а)рь|ские воеводства и повету Витебского их м(и)л(ость) п(а)нове пан Ѡпонас Ивановичъ | Мазоловскии, возныи г(о)с(по)д(а)рьскии воеводства Витебского, а пан Аброжеи, а пан | Ӕнъ Ӕновичи Буевъские Бүдеевичи, а пан Тимофеи Шапъка. Их м(и)л(о)сть | за үстною а ѡчевистою прозбою моею печати свои притиснути и ру|ки свои подписат рачили до сег(о) моего тестаменту.

Писан ү Витебску, | лета Божого нароженѧ тисеча пѧтсотъ деветдесѧт пѧтого, м(е)с(ӕ)ца ген|вара ѡсмого днӕ».

Партнёры — Кісларод
Партнёр — Цэнтр Кола
Партнёр — Сувеніры пра Беларусь
Партнёры — Трэці Сектар
Партнёр — Падароск
Партнёр — Будзьма
Партнёр — Viapol
Партнёр А-100
Кнігарня Логвінаў
Партнёр — Velcom па-беларуску
Партнёр — Лятучы ўніверсітэт
Партнёр — Галерэя Ў
Інфапартнёр — kniharnia.by
Інфапартнёр — Новы час
Інфа-партнёр — Разам
Інфа-партнёр knihi.by
Інфа-партнёр tuzin.fm
Інфапартнёры — ЭўраБеларусь
Інфапартнёры — Радыё Рацыя
Інфапартнёры — Нашыя Дзеткі
Інфапартнёр — Белсат