Пра курсы
ГАРАДЫ :


10.07.2015
КАЗКА “Замыкай!”*

(паводле беларускай народнай казкі)

 

Едзе ў горад пан заможны,

Гладкі, мажны – аж няможна,

Не відаць з-за шчок вачэй.

Сам кіруе. Найхутчэй

Трэба трапіць на кірмаш.

Толькі бачыць пане наш:

Воз паўзе. Марудна так.

Ды не абмінеш ніяк.

І сялянскі шэры конік

Трусіцца сабе паволі,

А паверх звязаных дроў

Спіць мужык, храпці здароў.

Як стрываць такія рэчы?

— Гэй, мужык! З дарогі прэч! —

Пан гукнуў. Мужык саскочыў

Дый узбочынай пакрочыў.

— Праязджай сабе, панок,

Хоць да д’ябла у мяшок!

— Мусіць, нейкі ты дурны!

Ты каня убок звярні!

Селянін каня распрог:

— Ўсё, паночак, далі бог!

Пан абцер спацелы лоб.

— Мусіць, здзекуешся, хлоп?

Воз з пуці прымі, зараза!

— Ты б, панок, сказаў адразу,

Што замінка будзе ў возе –

Не пацеў бы на дарозе! —

Адказаў мужык са смехам.

Пан у рэшце рэшт праехаў.

 

Раніцой паехаў сам

На кірмаш, шукаць аўса.

Ходзіць і ва ўсіх пытае,

Хто авёс на продаж мае.

Бачыць мужыка таго,

Ды не пазнае яго:

— Ці ня можаш падказаць,

Мо’, аўса тут дзе чуваць?

Скочыў мужычок на воз,

Уцягвае паветра носам:

— Не чуваць, паночку, не,

Нюх-та добры у мяне!

— Мусіць, ты з мяне смяешся?

Я пазнаў цябе нарэшце!

Ты —  учорашні, псякрэў!

— Ты, панок, не захварэў?

Мне гадоў ужо за трыццаць!

Ўчорашні! Як не здзівіцца!

Пан злуе: — Ты чый, халоп?

— Я? Мар’янін! Сведка – поп!

— А Мар’яна – хто яна?

— Па-царкоўнаму – жана!

— Я з табой губляю час.

Хто старэйшы там у вас?

— А! Бабуля Даміцэля,

Ёй сто год было ў нядзелю!

Пана ўжо амаль трасе.

— Каго слухаюць усе?

— Ёсць у нас хлапец адзін,

Год васьмі ці дзевяці.

Граць на дудцы – талент боскі.

Слухаем усёю вёскай!

Тупнуў пан нагой у злосці:

— Не! Каго вы баіцёся?

— Наш Піліп трымае гусі.

Не адзін я іх баюся.

Паўз  Піліпаў двор ніколі

Без дубца не ходзім болей!

— Сербанеш з табою ліха!

Хто у вас вышэй за усіх?

— А! Дык то, хіба, Аўдзей,

Ён вышэй за ўсіх людзей!

І мянушку мае – Бакшта.

Што, паночак, зноў не так што? –

Мужык пану падміргнуў.

Пан адно рукой махнуў.

Запытаў яшчэ ў каго-сьці –

Падказалі. Ён у госці

Да суседа паскакаў –

Скардзіцца на мужыка.

Твой мужык – Кандрат завецца –

Ён штораз з мяне смяецца!

І павагі ён не мае!

— Добра, зараз дапытаем!

Гаспадар гукнуў: — Кандрата!

Ну, калі ён вінаваты…

І, каб час не марнаваць,

Стаў паперы праглядаць.

Вось цівун зайшоў ў пакоі,

Цягне мужыка з сабою.

Вецер падхапіў паперы,

Бо не зачынілі дзверы.

Пан гукнуў:

— Мужык, замыкай!

— Му-у-у! – адказвае мужык.

Гаспадар пачырванеў.

— Гэта як жа ты пасмеў!

Што мне з ім рабіць, сусед?

— Бізуном надраць храбет!

Клічуць цівуна ізноў:

— Дай-ка хлопу бізуноў!

Ды Кандратка не драмаў!

У дурнога цівуна

Бізуноў вялізны пук

Проста  выхапіў ён з рук:

— Дзякуй вам, паны, сардэчны!

Ў гаспадарцы ўсё дарэчы!

Тыя аж аслупянелі.

А Кандратка – шмыг у дзверы!

І паны пасля таго

Толькі бачылі яго!

 

Алена Церашкова

© Triller-placate Inc.

____________________________________

 

*Замыкай! (Zamykaj!) – Зачыняй! (польск.)

Партнёр — menu.by
Партнёр — Кафэ “Грай”
Партнёры — Кісларод
Партнёр — Цэнтр Кола
Партнёр — Сувеніры пра Беларусь
Партнёры — Трэці Сектар
Партнёр — Падароск
Партнёр — Будзьма
Партнёр — Viapol
Партнёр А-100
Кнігарня Логвінаў
Партнёр — Velcom па-беларуску
Партнёр — Лятучы ўніверсітэт
Партнёр — Галерэя Ў
Інфапартнёр — kniharnia.by
Інфапартнёр — Новы час
Інфапартнёр — СВАЕ.БЕЛ
Інфа-партнёр — Разам
Інфа-партнёр knihi.by
Інфа-партнёр tuzin.fm
Інфапартнёры — ЭўраБеларусь
Інфапартнёры — Радыё Рацыя
Інфапартнёры — Нашыя Дзеткі
Інфапартнёр — Белсат